Uyu munsi taliki ya 1, ukwezi kwa gatanu mu mwaka wa 2026, kuri Diyosezi Gatolka ya Byumba, Umuryango wa Kolping ukorera muri Diyosezi ya Byumba wakiriye abanyamuryango bashya, biganjemo urubyiruko, mu birori byabereye mu gitambo cy'Ukaristiya cyaturiwe muri iyo diyosezi.

Iyi Misa yayobowe na Nyiricyubahiro Musenyeri Papias Musengamana, Umushumba wa Diyosezi ya Byumba. yashimiye cyane intambwe yatewe n’urubyiruko rwinjira muri uyu muryango, anabashishikariza gukomeza kwimakaza indangagaciro zishingiye ku Kwiga, Gusenga no Gukora.

Mu ijambo rye, Musenyeri Papias Musengamana nk'Umwepiskopi ushinzwe urubyiruko, abarayiki, n'andi matsinda atandukanye dufite muri kiliziya, yasabye ikintu gikomeye agira ati "mutange umusanzu mu iyogezabutumwa rya kiliziya buri wese ahereye k'unshingano, umwimerere n'ubutumwa bwe".

Abanyamuryango bashya bakiriwe biyemeje gukorana umurava, gukurikiza amahame y’uyu muryango no kugira uruhare mu bikorwa by’iterambere ryabo n’iry’Igihugu muri rusange.

Abari bitabiriye ibi birori bagaragaje ko bishimiye uburyo urubyiruko rukomeje kwitabira Umuryango wa Kolping, bakaba bizeye ko bizatanga umusaruro mwiza mu kubaka ejo hazaza heza.